Pages

Monday, May 11, 2015

హరాజీకాలు - 9 నలభై ఏడే ళ్లయింది మరి.....

హరాజీకాలు - 9


నలభై ఏడే ళ్లయింది మరి.....


సరిగా 47 ఏళ్ల క్రితం ఈరోజుల్లోనే మా బ్యాంకు వారి ‘క్లెరికల్ ఇండక్షన్ కోర్స్’ ట్రైనింగ్’కు రావలసిందిగా  నన్ను పిలిచారు. కాకినాడలో ట్రైనింగ్. నెలన్నర రోజులు. కాకినాడ స్టేట్ బ్యాంక్ మెయిన్ బ్రాంచి వెనక వైపు మా ట్రైనింగ్ సెంటర్. బ్యాంకులో చేరిన కొత్త. అంటే కాలరు ఎత్తుకు తిరిగే రోజులన్నమాట. ట్రైనింగ్ పీరియడ్ లో నెలకు వంద రూపాయలు  అలౌన్స్ గా  ఇచ్చేవారని గుర్తు. కాకినాడలో మా పిన్ని గారింట ఉండి ట్రైనింగ్ కు వెళ్లే వాణ్ణి. ఎందుకంటే మా సెంటర్ రెసిడెన్షియల్ కాదు. . హైదరాబాదు సెంటర్ కు , తర్వాత రోజుల్లో విజయనగరం సెంటర్ కు ఈ సదుపాయం ఉండేది. ఉదయమే మా కజిన్ నేనూ ఇంట్లో బయల్దేరి దారిలో ఏ కాకా హొటల్ లోనో బ్రేక్ ఫాస్ట్ లాగించేవాళ్లం. ఓరోజు నేనూ, ఓరోజు అతనూ బిల్లు కట్టాలి. అదీ ఒప్పందం.  కాకినాడలో చాలా కాలం అర్థణాకొక ఇడ్డెను దొరికేది. అలాగనే వెన్నతో పెసరెట్ ఒక స్పెషాలిటీ. కాకినాడలో పెసరట్ల సందని ఉండేది. ఆ సందులో చాలా ఇళ్ల ముందు పొయ్యి పెనం పెట్టుకుని, పెసరట్లు వేసేవారు. అక్కడ ఎప్పుడు తిన్న గురుతులేదు. ఒక్కోప్పుడు బ్యాంకు కేంటీన్ లో తినేవాళ్లం. మా కజిన్ తన పనిమీద తాను వెళ్లేవాడు. తరచు సినీమాలకు పోయేవాళ్లం.


ట్రైనింగ్ బోరుగానూ, హుషారుగానూ మిక్చర్ గానూ ఉండేది.
అక్కడ ఉండగానే ఓ సారి ఉప్పాడ  బీచ్ విజ్ఞాన యాత్రకు వెళ్లాము.... ఉప్పాడ సముద్రం … గొప్ప రోరింగ్ సీ. గొప్ప శబ్దంతో కెరటాలు ఉవ్వెత్తున ఎగిసి పడుతూ ఉంటాయి. ఆ అల్లకల్లోలంగా ఉన్న సముద్రం మీద నావలో  వెళ్లడం ఒక థ్రిల్. అక్కడ తిండీ, ఎంటర్ టైన్ మెంట్ .. ఆ  ప్రోగ్రామ్ మిత్రుడు శ్రీరామారావు చక్కగా నిర్వహించాడు. అప్పుడు  ట్రైనింగ్ లో పరిచయమైన అతడు ఇప్పటిదాకా మైత్రి కొనసాగిస్తున్నాడు. శ్రీరామారావు సామర్లకోట బ్రాంఛిలో చేసేవాడు. . కాకినాడ అతడి స్వస్థలం. గొప్ప డేరింగ్ ఫెలో (ఫెలో అంటే కాని ఇక్కడ ఊపు రాదు. శ్రీ రామారావుగారు  మన్నింతురుగాక) స్పోర్ట్స్ మీట్స్ లో పాల్గొనడానికి, రన్నింగ్ ప్రాక్టీస్ చెయ్యడానికి కాకినాడ నుంచి సుమారు 8 మైళ్లు సామర్లకోట దాకా పరిగెత్తేవాడాయన. జై ఆంధ్రా మూవ్ మెంట్ లో ఒకసారి కాకినాడలో చాలా పెద్ద మీటింగ్ .. పెద్ద పెద్ద వాళ్ళు  చాలామంది నాయకులు వచ్చారు. జనం విపరీతంగా వచ్చారు. ఎక్కడా నిలబడడానికి కూడా స్థలం లేదు. అప్పుడు  తాను వాలంటీర్ కాకపోయినా, చేతిలో ఒక కర్ర పట్టుకుని జనాన్ని అదుపుచేస్తున్నట్టుగా నడుస్తూ, నన్నూ మా అన్నయ్యను స్టేజి దాకా లాక్కు పోయి, అక్కడ వి.ఐ.పిల రోలోకూర్చోపెట్టాడు. అదీ
శ్రీ రామారావు. ఇతనే నాకు 7 అంగుళాల నేరో కట్ పాంట (టెర్రికాట్) కుట్టించుకోమని ఎంకరేజ్ చేసి అలవాటు చేసాడు. అప్పుడు అది ఫేషన్. ప్రస్తుతం తన పిల్లల దగ్గర యూ.యస్ లో ఉన్నారు.
సరే! మళ్లీ వెనక్కి వద్దాం... నేనైతే ఇంకో డిపార్ట్ మెంట్ లో చేసివచ్చాను కాని, చాలామంది ఫ్రెష్ ఫ్రం కాలేజీ ఆ అల్లరి లక్షణాలూ ఉండేవి.
ఆ సంవత్సరం బ్యాంక్ వైల్డ్ ఎనిమల్స్ కాలెండర్ వేసింది.నెలకోజంతువు బొమ్మతో ఆకర్షణీయంగా ఆ కాలెండర్  చాలా బాగుండేది. మా క్లాస్ రూమ్ లో గోడకి తగిలించారు. మాతో పనిచేస్తూ ట్రైనింగుకు వచ్చిన వ్యక్తొకతను లావుగా పొట్టిగా ఉండేవాడు. మనిషిలో ఏదో స్వార్థం, నలుగురితోనూ కలవకపోవడం కుర్రకారుకి ఇబ్బంది పెట్టేది. ఆ కాలెండర్ లో  రీనో (ఖడ్గ మృగం) ఉన్న నెల సంబంధం లేకపోయినా, ప్రతిరోజు పైకొచ్చేటట్టు పెట్టేవాడొకడు. క్లాసుకి రాగానే ఇందాకటి కొలీగ్ ముందు  కాలెండరే చూసేవాడు ..కోపమొచ్చేసేది.  ‘ఎవడిలా పెట్టా’డని, అది ఏదో కక్షతో  మార్చేసేవాడు. క్లాసులో గోల. మళ్ల్లీ మర్నాడు మామూలే .. వాళ్లు పెట్టడం వీడు ఉడుక్కోడం ..
మాకు స్టేజ్ ఫియర్ పోవాలని, ఏదో టాపిక్ మీద స్పీచ్ తయారు చేసుకొచ్చి మాట్లాడమనేవారు. మేము బుద్ధిగా ప్రిపేర్ చేసి, అందరి ముందూ ప్రెజెంట్ చేసేవాళ్లం. ఆదిశేషు అని గుంటూరు సైడునుంచి వచ్చిన కొలీగ్. ఆతను “నేటి సినీమాలు” అన్న టాపిక్ మీద వ్రాసాడు. పాటలలో అర్థంలేని పాటలు ఎలా వుంటాయో చెప్తూ ఆ పాటలన్నీ తన కంఠంతో పాడే వినిపించేవాడు. ఇబ్బంది పడి .. బాస్.. “యు నీడ్ నాట్ సింగ్ ద ఎంటైర్ సాంగ్ మిస్టర్ ఆదిశేషు , జస్ట్ టెల్ ది ఫస్ట్ లైన్”అంటే …
“అసలు నా ప్రెపరేషన్ అంతా సాంగ్స్ అండీ. విదౌట్ సాంగ్స్ ఐ కాంట్ టాక్” అనేవాడు.
ఏం చేస్తారు పాపం బాస్.. యస్ అనడం తప్ప … ఇలా సందడి సందడిగా ట్రైనింగ్ ప్రోగ్రాం గడిచేది.
ఇంచుమించు ఉన్న 30మందిలో సగానికి పైగా పెళ్లికాని కుర్రాళ్లే . మాలో పెళ్లికొడుకులెవరైనా ఉండకపోతారా అని ఆడ పిల్లల  తండ్రులు వచ్చి ఎంక్వైర్ చేసేవారు కూడా.


మేము ట్రైనింగ్ లో ఉండగా ఉగాది వచ్చింది. శలవు.  మర్నాడు శనివారం శలవు పెట్టుకుంటే ఆదివారము కలిసి వస్తుంది. దూరప్రాంతాలనుండి వచ్చిన మిత్రులు తమ తమ ఇళ్లకు వెళ్లడానికి శనివారం శలవు కావాలన్నారు. మాది రాజమండ్రి .. అయినా నాకూ శలవు కావాలని లీవ్ లెటర్ ఇచ్చాను. అందరికీ ఇవ్వడానికి శనివారం క్లాస్ ఉంటుంది ఇవ్వనన్నారు ఇన్స్ట్రక్టర్. కుర్రాళ్లు పట్టు పట్టారు. మెరిట్స్ ఆఫ్ ది కేస్ ..అవసరాన్ని బట్టి ఇస్తాను అన్నారు గురువుగారు. దూరంగా ఉన్నవారికి మంజూరు చేసి. “నీ కెందుకు” అని నన్న డిగారు .. వెంటనే “పెళ్లి చూపు” లన్నాను.. ఘొల్లు మన్నారు మిగతా వారు. ఏదో సరదాగా అన్నాననుకుని. అప్పటికే విషయం నేను బాస్ కు చెప్పేసాను, ఆయనా ఓ నవ్వు నవ్వి నాక్కూడా మంజూరు చేసారు . (నాకొచ్చిన సంబంధం- ఇందాక ప్రస్తావించిన ఆడపిల్లల తండ్రులద్వారా  కాదండోయ్.. మా చుట్టాల ద్వారా వచ్చింది.) అలాగ ఉగాదికి రాజమండ్రి వెళ్లి ఆ మరునాడు నేనూ, అమ్మా,నాన్నగారూ, మా అన్నయ్యగారబ్బాయి( చిన్నకుర్రాడు). ఏలూరు వెళ్లాము. యస్.ఐ గారమ్మాయిని చూసాం .. ఆవిడే కదా మరి  పెళ్లికూతురు. అమ్మా నాన్నగారూ ‘యస్’ అన్నారు. నేను ఏమీ అనకుండా వచ్చేసాను. ట్రయినింగ్ దిగ్విజయంగా పూర్తయింది. మరల బ్యాక్ టూ పలాస. నాన్నగారు నన్ను ఉత్తరాలలో నా అభిప్రాయం అడగడం మొదలెట్టరు. ఒక శుభ ముహూర్తాన ‘మీ ఇష్టం’ అన్నాను. ఆ మాట నా అభిప్రాయాన్ని గౌరవంగా నాన్నగారికి చేరవేసింది. తర్వాత కొద్దికాలం సైలెంట్ .. నెలాఖరుకు ముందే బ్యాంకులో జీతాలిచ్చేవారు. ఆ నెలజీతం తీసుకున్నాను .. ఇంటికి పంపవలసినది పంపేసాను. హోటల్ వారికి డబ్బు కట్టేసాను. నెలంతా టిఫిన్ కాఫీ, భోజనం అరువులో పెట్తాడు ఫర్వాలేదు. కొద్ది డబ్బులు సినీమాలకు వాటికీ ఉంచాను. అటువంటి సమయంలో.. ఒకటో తారీఖున టెలిగ్రాం నాన్నగారి దగ్గర్నుంచి. “మారేజ్ ఫిక్సుడు .. స్టార్ట్ ఇమ్మీడియేట్లీ “. అర్థం కాలేదు. కాస్సేపటికి  దేవాదిలో ఉన్న మా మేనమామ గారబ్బాయి.దగ్గరనుంచి  ఉత్తరం వచ్చింది. నువ్వు వెంటనే ఇక్కడకు వచ్చేయ్ . ఇక్కడ్నుంచి మనం వెళ్దాం అని. బయల్దేరాను. దేవాదినుంచి, అక్క (మేనబావ భార్య) నేనూ అరసవెల్లి - అన్నవరం బస్సులో బయల్దేరి, అన్నవరం మీదుగా కాకినాడ చేరాం. బావ ఏర్పాటుతో నాకు అక్కడ కావలసిన బట్టలు కొని, అక్కడే శ్రీరామారావు చెప్పిన టైలర్ కు(ఫామస్ - బెంగుళూర్ టైలర్స్ అనుకుంటా) ఇచ్చాము. అక్కడనుంచి రాజమండ్రి చేరాను. నాన్నగారి మీద, అమ్మ మీదా గుస్సా అయ్యాను. అంత సడన్ ఏమిటని. మంచి ఎండలు .. పెళ్లి పనులు. శుభలేఖలు ప్రింటింగ్ .. డిస్ట్రిబ్యూషన్ .. ఇంటికి రంగులు వేయించడం .. బజారు సామాన్లు అన్నీ ఇంచుమించు నేనే .. నాన్నగారు పెద్దవారు. నేనే ఆఖరువాడిని. అన్నయ్యలు ఉద్యోగరీత్యా శలవులు పెట్టుకు రాలేరు. ప్రైవేట్ బస్సులో పెళ్ళికి ఏలూరుకు తరలి వెళ్లాం. ఏలూరు కన్యకా పరమేశ్వరీ కళ్యాణ మంటపంలో పెళ్లి . వైభవంగా జరిగింది. చిన్న చిన్న పేచీలు, అలకలు, సమర్థింపులు. అదో ఆనందం.. అటూ ఇటూ కూడా  స్పోర్టివ్ గా తీసుకుంటే అవి మధుర జ్ఞాపకాలు.  


ఇంతకీ పెళ్లి రోజు ఎప్పుడో చెప్పలేదు కదూ… ఈరోజే .. 11 మే … 47 ఏళ్లక్రితం మే,11 - 1968న నా పెళ్లయింది. .. అందుకునే కదా ఈ తొందర.  ఆడ-పిల్ల విజయలక్ష్మి … ఈడ-కొచ్చి హనుమంతరావుకు

జీవితసహధర్మచారిణి అయ్యింది.

Saturday, May 9, 2015

హరాజీకాలు - 8---నటజీవితం - అరంగేట్రం

హరాజీకాలు - 8






నటజీవితం -  అరంగేట్రం
---డి.వి.హనుమంతరావు.


విశాఖజిల్లా పాయకరావు పేటలో  ఉద్యోగరీత్యా  కొన్నాళ్లున్నాను. . ప్రక్కనే తుని. రెంటికీ మధ్య తాండవ నది. దానిపై బ్రిడ్జ్. నదికి అటు వైపు ఉన్న- పాయకరావుపేట - విశాఖజిల్లా, ఇటువైపు ఉన్న - తుని, తూ.గో.జిల్లా. నేను మకాము తునిలో ఉండి రోజూ పాయకరావుపేట ఉద్యోగానికి వెళ్ళేవాడిని. అంటే రెండు జిల్లాలు మారేవాణ్ణన్నమాట. పిల్లలు తునిలో ఓ ప్రైవేట్ స్కూల్లో చదివేవారు. ఆ స్కూల్ కు మంచి పేరుంది. దానిక్కారణం ఆ స్కూల్ కరస్పాండెంట్ అని చెప్పక తప్పదు. మంచి కార్యసాధకుడు. పైకి అమాయకంగా కనిపించినా,  తన పని సాధించుకుంటాడు.


కొంచెం ముందురోజులకు  వెళ్తే.. తునిలో పబ్లిక్ పరిచయాలు నాకు ఈయనతోనే ప్రారంభం. ఓ సాయంత్రం నేను బయటికి వెళ్తే  ఈయన దారిలో కలిసాడు. ఆయన కూడా  అప్పటికి నాకు తెలియని వ్యక్తులు ఇద్దరున్నారు.
“రండి రావుగారు, కాసేపు కబుర్లు చెప్పుకుపోదాం” అంటూ ఆ ప్రక్కనే ఉన్న ఓ దేవాలయపు మంటపానికి దారి తీసాడు. మా మధ్య మాటలు అలా కుర్రకారు వారి చేష్టలు .. వాటిమీదకు పోయాయి.  
“పిల్లలు పాడైపోతున్నారండీ, అస్తమానం సినీమాలు, హోటల్స్ .. ఒక్కనిముషమైనా ఇంట్లో ఉండరు .. ఏంచదువుతారో ఏమిటో?” అన్నారు ఒకరు.
“రోజూ సాయంత్రమయ్యేసరికి హోటల్, శలవొస్తే సినీమా … ఏంటో పాడైపోతున్నారండీ” అని వాపోయడొకాయన.  [ఇక్కడ ఒక విషయం చెప్పాలి. అప్పుడింకా పెద్దలకు తెలియకుండా హోటల్ గోఇంగ్ లు, విచ్చలవిడిగా సినీమాలు లేవు. ఒకరకమైన కట్టుబాట్లలో ఉండేవారని, అదీ కాక ఈ కథా కాలం  డెబ్భైయోవ సంవత్సరం చివరి భాగంలోది. ముచ్చట్లు అంతకన్నా పాతవి కనుక, ఇంకా ఇంటర్ నెట్ లు, పబ్ లు, క్లబ్ లు, పిజ్జాలు, నూడిల్స్, బర్గర్ లు … ఇలాంటి కల్చర్ కు విద్యార్థి లోకం అలవాటు పడలేదు. ముఖ్యంగా తుని లాంటి టౌన్స్ లో. - అర్థం చేసుకోండి]
నిజం చెప్పాలంటే, మేమూ కాలేజి డేస్ లో మరీ కాకపోయిన .. కొంతవరకైనా, హోటల్ వాసన తెలిసినవాళ్లమే, సినీమాలు చూసినవాళ్లమే .. కాని ఇప్పుడు కొంచెం పెద్ద మనిషి తరహాగా ఉండాలిగా. అప్పుడు నేనన్నాను.
“అంత ఠంచ్చన్ గా సాయంత్రం అయ్యేసరికి హోటల్ కు ఎందుకు వెళ్తారో చెప్పనా” అన్నాను ..  
“చెప్పండి” అంటూ  ఉత్సాహపరిచారు అక్కడున్నవారు.
“కందులు వేయించి, పప్పు చేసి శుభ్రపరుస్తారు కదా, అప్పుడు వచ్చిన పొట్టు, కొంత కందిపప్పు నూకతో కలిసి కమ్మగా ఉంటుంది.. పశువులు పగలంతా మేతకెళ్లొచ్చే టైముకి కుడితిలో ఈ కందిపొట్టు కలిపి రెడీగా ఉంచుతారు. పశువులు దానిపట్ల మక్కువతో పరుగు పరుగున ఇళ్ళకొచ్చేస్తాయి. అదిగో ఆ కందిపొట్టు హోటల్ వాళ్లు సాంబారులో కలుపుతారట. {ఇది నిజమో కాదో నాకు తెలియదు, ఐ గాట్ నో ప్రూఫ్}. మనం కూడా ఆ సాంబారు మీద మక్కువతో కుడితి మరిగిన పశువుల్లాగా హోటల్ కు పోతామన్నమాట…” అని చెప్పగానే జోకును మనసారా ఎంజోయ్ చేసారు మిత్రులు ఐనవారు, కాబోయేవారు.
“టిఫిన్స్ అంతంత రేట్స్ ఏంటండీ” అంటూ మరోసారి వాపోయారు…
“అయ్యా! ఇక్కడ ఒకవిషయం గమనించాలి, రేట్ దోసెలో కంటెంటుకి, పెట్టిన ఇడ్లీలసంఖ్యకూ  కాదు.. తక్కువ మినప్పిండితో ఇడ్లీ పడిపోకుండా ప్లేటులో ఎలా పెట్టాడన్న వాడి నైపుణ్యానికి. .. ప్రొద్దున్న ఒక చెమ్చా దోసెపిండి కాలే పెనం మీద వేసి సాయంత్రందాకా దోసెలు పెనం మెదనుంచి తీసే వాడి ప్రతిభకు .. నిజంగా ఎన్ని డబ్బులిస్తే సరిపోతుందండీ వాడి పనితనానికి, వాడి స్కిల్ కు“ .. అనగానే అన్ని బాధలూ మరచి ఆనందంగా హాయిగా
నవ్వుకున్నారు - మిత్రులు . ఆ రోజు పరిచయం అయిన షుగర్ కేన్ ఇన్స్పెక్టర్ గారు, సుమారు ముప్ఫై అయిదు - నలభై  సంవత్సరాలైనా  మా స్నేహాన్ని ఇప్పటికీ ఆత్మీయంగా మధురంగా కొనసాగిస్తున్నారు. మరి షుగర్ కేన్ అంటేనే మధురం కదా…


ఆ కరస్పాండెంట్ గారు-- స్కూలు ‘పేరెంట్స్ అసోసియేషన్’ లో మమ్మల్ని ముఖ్య సభ్యులుగా చేసారు. నాకు అప్పటికి 36 సంవత్సరాల వయస్సు, షుగర్ కేన్ ఇన్స్పెక్టర్ గారు  నాకన్నా కొంచెం పెద్ద. గౌరవనీయమైన ఉద్యోగాలు మావి అని పెద్దవాళ్లను కమిటీలో పెట్టుకుంటే స్కూలుకు గౌరవమని, మమ్మల్ని పెట్టాడాయన. మాది కొంచెం ఉడుకు రక్తం ..  మేమిద్దరం కలిస్తే .. సందడే సందడే .. ప్రథానప్రతిపక్షంలా కరస్పాండెంట్  అవునన్నది కాదనడమే మా లక్ష్యం,.
ఏది రైటో, ఏది రాంగో మాకు అంతగా ఆలోచించేవాళ్లము కాదు.  .. మీటింగుల్లో కరస్పాండెంట్ గారు మాత్రం ముఖంనిండా నవ్వు పులుముకునేవారు తప్ప మనసారా నవ్వేవారా అంటే అనుమానమే.                                     


ఓ సారి, “పిల్లలకు పుట్టినరోజులకి ఇళ్లకు గ్రీటింగ్స్ ఏదైనా చిన్ని కానుక పంపుదామనుకుంటున్నాను” అని  ప్రొపోజల్ పెట్టాడు..
“మీ అభిప్రాయం చెప్పండి” అని జనరల్ బాడీని అడిగాడు.
నిజానికి చాలా మంచి ఆలోచనే ఆలోచిస్తే.. బాగుందని చాలా మంది ఓటేసారు..
“ఐ అబ్జెక్ట్ యువర్ ఆనర్” అన్నాను..
“ఏమి”టన్నారు  కరస్పాండెంట్ గారు.
“మా ఇద్దరి పిల్లల పుట్టినరోజులు సమ్మర్ హాలిడేస్ లో వస్తాయి, నాకు కిట్ట”దన్నాను.
ఘొల్లు మని నవ్వులు, అందరు ముక్త కంఠంతో వద్దన్నారు.
తర్వాత మళ్లీ మమ్మల్ని కన్విన్స్ చేసి, ఆ ప్రపోజల్ ను యాక్ట్ గా పాస్ చేసాడాయన. అదే కార్యసాధకుడి లక్షణం.
పేరెంట్స్ డే చేసి, ఫంక్షన్ చేద్దామన్నారు ఓసారి. సరే అన్నాము. అయితే ఎవరో ఎమ్.ఎల్.ఏ ని పిలుస్తానన్నారు
చీఫ్ గస్ట్ గా ..
“నతింగ్ డూఇంగ్..రాజకీయ నాయకులొద్దు. అంతకీ కావాలంటే వచ్చిన పేరెంట్స్ లో ఒక వృద్ధుడినో, లేక మంచి ఉద్యోగస్తుడినో పిలుద్దామని మా ఆలోచన.” అని మేమన్నాము.
ఇంత మంచి ఫంక్షన్ కు నలుగురూ వస్తారుకదా, అలాంటప్పుడు  ఏ ఎమ్.ఎల్.ఏనో పిలిఛి గౌరవిస్తే, తమ స్కూల్ భవిష్యత్ దృష్ట్యా బాగుంటుందని అతని యోచన. మన ఫంక్షన్ క్రెడిట్ ఆతడు పట్టుకుపోవడమేమిటని మా ఆలోచన. తనకు అనుకూలంగా ఉన్న టీచర్స్ చేత, కొందరి పెద్దల చేత మాకు రాయబారాలు సలిపారు .. కరస్పాండెట్ గారు. చివరికి మోర్నింగ్ ఫంక్షన్ మా పేరెంట్స్ పరంగానూ, ఈవెనింగ్ పబ్లిక్ ఫంక్షన్ .. ఆయనిష్టం అని సెటిల్ చేసాం… మార్నింగ్ ఫంక్షన్ కు తుని స్టేట్ బ్యాంక్ ఆఫ్ ఇండియా ఎ.డి.బి. బ్రాంచ్ మేనేజర్ (ఆయన ఒక పేరెంట్) విశిష్ట అతిథి. సాయంత్రం తుని బుల్లిబాబుగారు, అప్పటి ఎమ్.ఎల్.ఏ ఆత్మీయ అతిథి.
ఆనాటి  వేదిక మీదనే  నా నట జీవితానికి అరంగేట్రం.. భమిడిపాటి కామేశ్వరరావుగారి నాటిక..భజంత్రీలు. అందులో నేను హీరో ఫ్రెండ్ ను. నాతోనే సీన్ ప్రారంభం. ఏదో ఉత్తరం. అది చదువుతున్నట్టుగా నిలుచుని ఉంటే సీన్ మొదలవుతుంది. ఉత్తరం పైకి పట్టుకున్నా.. కానీ చేతులు వణుకుతున్నాయి.. ఆ తర్వాత సీన్ లో .. విషయం హీరో తాతో తండ్రికో వినిపిస్తాను. ఆయన నమ్మనంటాడు. అప్పుడు నేను ఉత్తరం చూపాలి. ఆ తాతో తండ్రో వేషం ఇందాకా ప్రస్తావించిన బి.ఎమ్ గారు వేసారు. నమ్మనంటే ఉత్తరం చూపిద్దామని నేననుకుంటే, ఆయన నమ్మినట్టు ఏమీ అనకుండా అలా కుర్చీలోకి చూస్తూ ఉండిపోయాడు.. ఇక నా పరిస్థితి ఆలోచించండి. తర్వాత ఏంచెయ్యాలో తెలియదు. అనుభవం లేదు కదా.. నేను గుటకలు మింగుతున్నానని ఆయనకు తెలిసి.. లేచి “నేన్నమ్మనయ్యా” అన్నాడు. “హమ్మయ్య” అని నిట్టూర్చి నేను కంటిన్యు చేసా.. తర్వాత చాలా నాటికలు వేసాను..టి.వి.సీరియల్స్ చేసాను. హాస్యరచనలు చేసాను, వాటిలో నటించాను కూడా .  నా నటనకు కూడా  అభిమానులున్నారు. కళాతపస్వి అయితే ఒక సీరియల్ లో నా మాడ్యులేషన్ బాగుందని కితాబిచ్చారు కూడా .. .

పేరెంట్స్ లో ఈ స్కూలు పట్ల కొన్ని కంప్లైంట్స్ కూడా ఉండేవి. మా దృష్టికొచ్చినవి, మరి కొన్ని, కొంత నాటకీయత కలిపి ఒక ఆడియో డ్రామా తయారు చేసాం. అందులో ప్రధాన పాత్రధారులం మేమే. ఆయన గొంతు నేను ఇమిటేట్ చేసాను. రికార్డింగ్ చేసి ఆయనకే వినిపించాం. ఆయన నవ్వుతూ తీసుకున్నాడు కానీ .. నవ్వుతూనే తీసుకున్నాడా అన్నది అనుమానం. అయితే మా మైత్రి కొనసాగింది..అది ఆయన గొప్పతనం.